Белгілі қазақстандық продюсер Баян Алагөзованың қызы – Айсәуле Бақытбек жақын адамынан айырылғаннан кейінгі жан күйзелісін әлеуметтік желіде ашық түрде бөлісті. Бұл туралы ozgeris.info сайты Liter.kz сайтына сілтемемен жасап хабарлайды.
Айсәуленің жазбасына қарағанда, ол – үш баласының атасы, яғни жұбайының әкесі өмірден озған. Бұл қайғы отбасы үшін ауыр соққы болған. Жазбасында Айсәуле өзінің әрі отбасының ішкі жан күйзелісін былай жеткізеді:
«Сүйіктіме қарап, ішіндегі шексіз ауырсынуды көремін. Ал мен ештеңе істей алмаймын. Мұндай жараға таңу бола ма?.. Балаларыма қараймын – олар “әлемдегі ең көңілді әрі мейірімді досы” келетін шығар деп үмітпен күтіп отыр. Ал мен жүрегімді ауыртпай, оларға қалай шындықты жеткізсем екен деп жүз рет ойланып жүрмін…»
Желі қолданушылары Айсәуленің жазбасына бей-жай қарамай, көптеп жылы лебіздерін білдіріп, қолдау көрсетті.
Жазбасын жалғастыра келе, Айсәуле қиын кезеңде стресспен қалай күресіп жүргенін де бөлісті. Отбасылық фотолар астында ол былай деп жазды:
«Үй, балалар, жайлы ошақ, жұмыс, шоппинг, сұлулық салоны… және ыдыс жуу. Менің стрессіммен күресу жолдары – осы»
Көптеген оқырмандар Айсәуленің осы жазбасынан өздерінің де өмірлік сезімдері мен күйзелістерін көріп, күнделікті қарапайым тірліктің адамды қалай тыныштыққа әкелетінін мойындады.
