Қазақстанда көлік инфрақұрылымын ерекше қажеттіліктері бар жандарға бейімдеу жұмыстары жалғасуда. Үкімет отырысында Көлік министрі Нұрлан Сауранбаев саладағы негізгі өзгерістер мен алдағы жоспарлар туралы баяндады деп хабарлайды ozgeris.info сайты.
Теміржол көлігі мен вокзалдар Министрдің айтуынша, қазіргі таңда теміржол көлігіндегі пойыздардың 90%-ы арнайы көтергіштермен және бейімделген купелермен жабдықталған. Ал 2030 жылға қарай әрбір пойыз құрамында кем дегенде бір арнайы вагон болады деп жоспарлануда.
Бұдан бөлек, вокзалдарды қайта жаңартудың ауқымды бағдарламасы аясында барлық қажетті қолжетімділік элементтері қарастырылып жатыр. Олардың қатарында:
Пандустар мен лифтілерді орнату;
Арнайы көтергіш құрылғылармен қамтамасыз ету;
Касса аймақтары мен санитарлық бөлмелерді қайта жабдықтау.
Авиация саласы Әуежайлардың қолжетімділік деңгейі де артып келеді. Қазіргі уақытта еліміздің әуе айлақтары ерекше қажеттіліктері бар жолаушыларға қызмет көрсетуге арналған базалық жағдайлармен толық қамтамасыз етілген.
Автомобиль және қалалық көліктер Автомобиль көлігі саласында инклюзивтілік деңгейін арттыру кезең-кезеңімен жүзеге асырылуда. Бүгінгі статистикаға сүйенсек:
Автовокзалдар мен автобекеттердің шамамен 80%-ы қолжетімділік талаптарына сай;
Қалалық автобустардың 79%-ы ерекше қажеттіліктері бар жолаушыларға бейімделген.
Сондай-ақ елімізде инватакси жүйесі де жүйелі түрде дамып келеді. Соңғы мәліметтер бойынша, арнайы автопарк 30%-ға ұлғайып, көлік саны 1 426 бірлікке жеткен.
