Президент Қасым-Жомарт Тоқаевтың 2026 жылды «Еріктілер жылы» деп жариялауына орай, ел аумағында ауқымды әлеуметтік бастамалар бастау алды. Осы бағытта «Жаңа адамдар» қозғалысы қазақстандықтарды нақты әрекетке шақырып, республикалық деңгейде қан тапсыру акциясын қолға алды деп хабарлайды ozgeris.info сайты.
Еріктілік — бұл жай ғана көмек емес, бұл айналаға бейжай қарамайтын жауапты азаматтың таңдауы. Биылғы жылдың басты бағыты ретінде айқындалған бұл құндылықты дамыту мақсатында «Жаңа адамдар» қозғалысы өмірлік маңызы бар бастаманы жариялады.
Қозғалыс өкілдерінің айтуынша, қан тапсыру — нағыз еріктіліктің көрінісі. Себебі қанды жасанды жолмен жасау немесе технологиямен алмастыру мүмкін емес. Ол тек адамның өз еркімен жасаған ізгі қадамы арқылы ғана табылады.
Қан тапсыру штабтары ашылған қалалар: Акция ауқымы Қазақстанның 18 ірі қаласын қамтиды: Астана, Алматы, Шымкент, Қарағанды, Ақтөбе, Тараз, Павлодар, Өскемен, Семей, Қостанай, Қызылорда, Орал, Атырау, Ақтау, Петропавл, Көкшетау, Талдықорған және Түркістан.
Қалай қатысуға болады? Игі іске үлес қосқысы келетін әрбір ерікті qantapsyr.kz ресми сайтына тіркеліп, донорлыққа қатысты барлық қажетті ақпаратпен таныса алады.
Бұл бастама — тек медициналық көмек қана емес, бір-біріне немқұрайлы қарамайтын, қуатты әрі жасампаз қоғам қалыптастырудың жолы. Өзгерістер әр адамның «шетте қалмаймын» деген нық шешімінен басталады.
