Олимпиада чемпионы Елдос Сметов Халықаралық дзюдо федерациясында (IJF) қызмет жолын бастауға бір қадам жақын. Бұл туралы ozgeris.info сайты Offside.kz сайтына сілтемемен хабарлайды.
Qazaqstan Barysy Grand Slam турнирі қарсаңында өткен баспасөз мәслихатында ұйымның төрешілер директоры Армен Багдасаров Елдос Сметовтің болашағына қатысты пікір білдірді.
— Елдос Сметов — тек Қазақстанның ғана емес, әлемдік дзюдоның да жарық жұлдызы. Олимпиада чемпионы, ойындар жүлдегері, әлем чемпионы ретінде ол біздің командада болуға әбден лайық. Көптеген чемпиондар федерация жұмысына қызығушылық таныта бермейді. Бірақ егер Елдос ағылшын тілін меңгеріп, қызығушылық білдірсе, біз оны жауапты қызметтерден бастай аламыз. Мұндай дарынды жандарға біз әрқашан ашықпыз, — деді Багдасаров Қазақстан дзюдо федерациясының баспасөз қызметіне берген сұхбатында.
Айта кетейік, Елдос Сметов 2024 жылы Париж Олимпиадасынан кейін кәсіби спорттағы мансабын аяқтаған. Қазіргі уақытта ол Ұлыбританияда тұрып, ағылшын тілін меңгеруге күш салуда. Бұл бастама — халықаралық спорт ұйымдарында жаңа деңгейге көтерілуге жасалған маңызды қадам.