28 шілде Астана қаласындағы 6636 әскери бөлімінің аумағында ант қабылдау салтанатты рәсімі өтті, деп хабарлайды Өзгеріс.инфо Ұлттық ұланның баспасөз қызметіне сілтеме жасап.
Биыл әскери бөлімнің қатарына 140-тан астам жас сарбаз қосылды. Жаңадан келген сарбаздар – Шығыс Қазақстан, Солтүстік Қазақстан, Ұлытау және Алматы облыстарынан шақырылған.
Жас сарбаздар оқу пунктінде болған кезде әскери құқықтық тәртіптің негіздерімен танысты: олар әскери қызметшінің лауазымдық арнайы міндеттерін, қару-жарақпен және қарусыз саптық техниканы, күнделікті тәртіп элементтерін зерттеді, дене шынықтыру бойынша қабілеттерін дамытты, атыс дайындығын зерттеді, мемлекеттік құқықтық дайындық бойынша білімдерін жетілдірді.
Іс-шараның басында еліміздің әнұраны шырқалып, 6636 әскери бөлімінің командирі полковник Ерлан Буранбаевтың бұйрығымен әскери бөлімнің Жауынгерлік туы алаңға шығарылды. Осыдан кейін командир жауынгерлерге әскери анттың маңыздылығы туралы айтып, одан әрі қызметте сәттілік тіледі. Отан қорғаушыларды құттықтауға достары, туған-туыстары, сондай-ақ Қарулы Күштердің ардагерлері келді. Жас ұландықтарды 6636 әскери бөлімнің ардагерлері құттықтады.
Сарбаздарға Отанды қорғау және өз халқына адал болуға ант беру әрбір азамат үшін қасиетті парыз және адамгершілік ұғым екені айтылды. Енді олар елорда тұрғындарының тыныштығын күзететін нағыз сарбаздарға айналды.
Сондай-ақ қатардағы Қуаныш Төкеновтың анасы Жанар Нығметбекқызы ата-аналардың атынан бөлім қолбасшылығына алғысын білдіріп, ұлына және барлық Отан қорғаушыларға деген лебізін білдірді.
«Біз ұлдарымызды Қазақстанның қақ ортасында, осындай салтанатты жағдайда көргенімізге қуанып отырмыз. Кеше ғана олар алаңсыз, бейжай жүрген еді, ал бүгін қару ұстап, өздеріне сенімді болуды үйренгендей. Мен бүгін қатты қуанып, әрі толқып тұрмын», — деді сарбаздың анасы.
Барлық қатысушылар алдында оқу пунктінің 3 оқу взводының атқышы қатардағы жауынгер Батыр Хайрулин сөз сөйледі.
«Құрметті жауынгерлер, сіздерді әскери ант қабылдауларыңызбен құттықтаймын! Сізге осы жылға лайықты қызмет етуіңізді тілеймін. Құрметті ата-аналар, біз сіздерге бір жылдан кейін үйге абыроймен және мақтанышпен ораламыз деп уәде береміз», – деді ол.