Ақпарат және қоғамдық даму министрі Дархан Қыдырәлі мектепке хиджабпен баруға рұқсат беру жөнінде өз пікірін білдірді, деп хабарлайды «Өзгеріс» ақпараттық-сараптамалық порталы.
«Бірінші кезекте жалпы зайырлылық ұстанымын баса айтқан жөн. Себебі, біздің Ата Заңымыз бар, белгілі заңдар бар. Сондықтан, зайырлылық принципі – еліміздің басты ұстанымы. Екіншіден, кейбір қоғамдық пікір қалыптастырушылар манипуляцияға итермелейтін сияқты. Мысалы, кейбір желі қолданушылары «халықаралық тәжірибеде, әлемде бұл мәселе шешімін тапқан» деп үзілді-кесілді жазған екен. Меніңше, бұл — фейк ақпарат. Себебі дамыған, зайырлы, демократиялық Франция, Аустрия сияқты елдер жасына байланысты хиджабқа шектеу қойған. Әрине, рұқсат ететін елдер де бар. Сондықтан, біз бұған байланысты халықаралық тәжірибенің әртүрлі екенін көреміз. Әр түрлі мемлекеттің өзіне сай ұстанған бағыты бар, тәжірибесі бар. Біздің де өзіндік ұстаным-бағытымыз бар. Ол — зайырлылыққа және Ата Заңға бағыну», — деді министр YouTube платформасындағы «Өзекті» жобасында.
Д. Қыдырәлі Білім туралы заңда да мектеп формасы нақты бекітілгенін еске салды. Жақында Оқу-ағарту министрі Ғани Бейсембаев өз пікірін айтқан еді.
«Тағы бір айта кетерлік жағдай, біз діни сенім бостандығына да құрметпен қараймыз, мемлекетте оған барлық жағдай жасалған. Айталық, дін істері басқармаларына қарасты медресе-колледждер бар, соларда қыз балалардың білім алуына жағдай жасалған. Сонымен қатар, бұл мәселеге дәстүр тұрғысынан да қарайтындар бар. Білім беру мекемелерінің басты мақсаты – оқыту, балаға білім беру. Құранның да алғашқы әмірі «Оқы» деп басталатынын білеміз. Ең бастысы, бұл тақырыпты саясиландырмау керек. Себебі, саясилану, радикалдану ең әуелі діннің өзіне қаншалықты қауіпті екенін біз Таяу Шығыстан немесе төңіректегі елдерден жақсы білеміз», — деді Дархан Қыдырәлі.