ҚР Сыртқы істер министрлігінің ресми өкілі Айбек Смадияров Кенесары басын іздеу жұмыстары жөнінде пікір білдірді, деп хабарлайды «Өзгеріс» ақпараттық-сараптамалық порталы.
Апталық брифингте тілшілер ресми өкілге «Сыртқы істер министрлігі Кенесарының басын іздеу бойынша шара қабылдай ма?» деген сұрақ қойылды.
«Мұндай мәселелермен тарихшылар, тар ауқымдағы мамандар айналысуы керек. Әйтсе де дипломатиялық арналар арқылы бізге де салалық ведомстволардан сұрақтар келіп түседі. Тиісінше, біз оларды ресейлік тарапқа жібереміз. Кейбір ресейлік тарап бұл бас мүлдем жоқ деп те айтып жүр. Меніңше, тарихшылар бұл мәселемен айналысып, анығын айтуы керек», — деп жауап берді А. Смадияров.
Сонымен бірге, тілшілер «Кенесары басын қайтару мәселесі саяси жоғары деңгейде тұрған жоқ па?» деп сұрады.
«Білесіздер ме, бізде басқа да мәселелер толып жатыр. Жұмыс істеу керек», — деді Айбек Смадияров.