Ештен кеш жақсы. Біздің билік мемлекет үшін ең маңызды мәселені түсінген сыңайлы деп пікір білдірді экономист Айбар Олжаев.
Кез келген елдің өсіп-өркендеуіне инфрақұрылым ауадай қажет. Дамыған елдерге бара қалсаңыз, тақтайдай тегіс жолдарына қарап тамсанамыз. Бұйыртса, Қазақстан да осы қатарға қосылатын күн жақын.
Сенат спикері Мәулен Әшімбаевтың «Время» газетіне мақаласы шықты. Сонда осы инфрақұрылымға қатысты біраз дүние айтылған.
Мысалы, Қазақстан 2030 жылға дейін 4,7 мың автожолды жаңадан салып шығады екен. Бұған салынып жатқан 7 мың шақырымды қосыңыз. Демек, алдағы бес жылда жол құрылысы саласында қызу жұмыс жүреді деген сөз. Бұдан бөлек, мың шақырымға жуық теміржол желісін тарту жоспарда тұрған көрінеді.
Бұл – еліміз үшін кейінгі жылдардағы ең маңызды бастаманың бірі. Қазақстанның түкпір-түкпірінен байланыстыратын инфарқұрылым экономикалық тұрғыдан да, халыққа қолайлы жағдай жасау тұрғысынан да маңызға ие. Біріншіден, күре жолдарды кеңейтіп, көбейту арқылы еліміздің транзиттік потенциалын арттырамыз.
Әлемдегі жағдайдың лезде өзгеріп жатқанына куә болып отырмыз. Сондықтан Қазақстанға бірнеше балама бағыт керек.
Қытайдан шыққан тауарды Еуропаға, Өзбекстан мен Қырғызстанның жеміс-жидегін Ресейге өткізу арқылы да қыруар қаржы түседі. Мұнайымызды сату үшін КТК-ға ғана тәуелді болмай, басқа бағыт арқылы да жөнелтуге мүмкіндік туады.
Екіншіден, күре жолдардың бойындағы ауыл-аймақтың дамуына жағдай жасалады. Тауар тиеген фуралар жолда тоқтап демалып, тамақ ішеді. Бензин құяды. Сусын сатып алады. Мұның бәрі шағын және орта бизнеске серпін береді.
Жолымыз тақтайдай тегіс болған соң ондағы жүріп-тұратын көліктер де көбейеді. Мотел бизнесі, азық-түлік дүкені, тамақтану орындары жанданады. Оның бәрін жүргізетін кім? Әрине, өзіміздің қарапайым қазақтар. Айта берсеңіз пайдасы шаш етектен.
Үшіншіден, халықтың жүріп-тұруына қолайлы жағдай жасалады. Алысқа бармай-ақ қоялық. «Батыс Қытай – Батыс Еуропа» жобасының өзі бір қаладан екінші қалаға жетуді әжептеуір жеңілдетті.
«Әрине, жол салуға тәуелсіздік ала сала кірісуіміз керек еді. Бірақ бұған кейінгі 5 жылда ғана кірістік. Ештен кеш жақсы», — деді сарапшы.