Теміртауда жалғыз тұратын 67 жастағы қарияны соққыға жыққан жасөспірімдер өздері де құрбандарға айналды. Тергеу барысында оларды өз құрдастары «көшедегі әділдік» бойынша жазалағаны анықталды, деп хабарлайды Ozgeris.info тілшісі HALYQSTAN Telegram арнасына сілтеп.
Жергілікті оқушылар әлеуметтік желіде тараған видеоға ашуланып, зейнеткерге шабуыл жасаған екі жасөспірімді тауып, күш қолданған. Олар да бұл әрекетті видеоға түсірген. Нәтижесінде екі жасөспірімге қатысты «Денсаулыққа қасақана зиян келтіру» бабы бойынша қылмыстық іс қозғалып, олар есепке алынды. Қазіргі уақытта бостандықта.
Қарағанды облысы ПД баспасөз қызметінің мәлімдеуінше, кез келген заңсыз әрекеттерге құқықтық баға тек заң аясында берілуі тиіс. Құқық бұзушылықтарға тек құқықтық өрісте жауап қату қажет.
Қарияға шабуыл жасаған бес күдікті ауыр қылмыс жасады деп танылып, (ҚР ҚК 191-бабы 3-бөлім – алдын ала сөз байласу арқылы жасалған тонау) қамауға алынды.