Мемлекет меншігіне қайтарылған, құны 250 миллион теңгеден асатын алтын сағаттар аукционға шығарылды. Жалпы саудаға 28 эксклюзивті сағат ұсынылған.
Ең арзаны 26 мың теңгеден басталады. Ал ең қымбаты 31 миллион теңгеге жетеді.
Аукционға шығарылған бұйымдардың арасында Patek Philippe маркасының сирек кездесетін үлгілері бар. Мысалы ақ алтыннан жасалған қол сағатының құны 31,2 млн теңге. Сонымен қатар Bovet Fleurier Grand Complications Amadeo Fleurier қалта сағаты (28,8 млн теңге) және World Time Chronograph Green Mecca Edition (16 млн теңге) платинадан құйылған, крокодил терісінен жасалған баулары бар.
Сонымен бірге Montblanc Timewalker Urban Speed (303 мың теңге), Alpina Pilot Heritage (157 мың теңге) сияқты салыстырмалы түрде қолжетімді модельдер де сатылымда.
«Ұйымдастырушылар коллекциялық құндылығы жоғары бұл сағаттардың біразы ауқатты азаматтардың назарын аударады деп күтуде. Ең қымбат үлгілердің бұған дейін кімнің иелігінде болғаны белгісіз (Сатыбалды? Боранбаев?), сол себепті сериялық нөмірлері мен суреттері ғана көрсетілген», — деп пікір білдірді Әшкере арнасы.
Сағаттарды сатып алғыңыз келсе, осы жерге өтіңіз.
Активтерді басқару компаниясының мәліметінше, электрондық сауда-саттық 2025 жылғы 27 және 28 ақпанда сағат 10:00-де E-Qazyna веб-платформасында өткізіледі.
«Аукцион аясында 27 ақпанда – 5 актив, 28 ақпанда – 23 актив бағаны көтеру форматы бойынша сатылымға шығарылады. Барлық активтер ашық және бәсекеге қабілетті жағдайларда, саудаға қатысушылардың тең қолжетімділігі қамтамасыз етіле отырып сатылады», — делінген хабарламада.