Құлсары қаласында су тасқынынан зардап шеккендерге арналған 150 үй салынады

Атырау облысының Құлсары қаласында су тасқынынан зардап шеккен тұрғындарға арналған 150 үйдің құрылысы басталады. Бүгінде әрқайсысы 80 шаршы метр болатын 74 типтік үй үшін учаскелер анықталды, деп хабарлайды өңірдің жедел штабы. Негізгі құрылысты келесі аптада бастау жоспарланған, деп нақтылады облыстық құрылыс, сәулет және қала құрылысы басқармасының басшысы Нұрберген Құсайынов.

"Тұрғын үйлер облыстық бюджет пен демеушілік қаражат есебінен салынады. Құрылысты жергілікті мердігерлік компаниялар жүргізетін болады ", - деді ол.

Шағын аудан инженерлік-коммуникациялық инфрақұрылыммен - электрмен, сумен қамтамасыз етілген, газбен жабдықтау бойынша жұмыстар жүргізілуде. Шағын аудан аумағында 2000 орындық Binom мектебінің құрылысы жоспарлануда, Бұдан басқа, мұнда 300 орындық балабақша салынады, тұрғындардың демалуы үшін шағын аллеялар жасалады. Облыс әкімінің тапсырмасымен әлеуметтік нысандардың ЖСҚ әзірлеу басталды.