Түркістан облысында балабақша тәрбиешілері бүлдіршіндерге қол жұмсаған. Кейбірі тіпті баланы еден жуғышпен ұрған. Оқиға Келес ауданында болған. Мұндай заңбұзушылықты прокурорлар тексеру кезінде анықтады. Мектепке дейінгі мекемелерде сондай-ақ, тәрбиешілердің балаларды шымшып, ұратыны және қараусыз қалдырып, ұйықтап жататыны белгілі болды.
Қазір аудандағы 4 балабақшаның тәрбиешілеріне қатысты қылмыстық іс қозғалды. Оларға балаларды ұрып-соқты деген айып тағылды. Тиісті сараптамалар тағайындалып, күдіктілердің ісі сотқа жіберілді, деп хабарлайды Qazaqstan телеарнасы.