БҚО әкімінің баспасөз қызметінің басшысы Ержан Тәткен өңірдегі жағдай әлі де күрделі екенін — Ресейдің Орынбор облысынан Жайық өзеніне көп мөлшерде су келіп түсіп жатқанын айтты.
Су басу аймағында Ақжайық, Бөрлі, Бәйтерек, Теректі аудандарының 80-нен астам елді мекендері, сондай-ақ өзен бойында орналасқан Орал қаласының аумақтары да бар. Аталған елді мекендерден тұрғындар эвакуациялануда.
«Мамандардың болжамы бойынша, Орынбордан су облысқа 17-19 сәуірде келеді. Су тасқынының алдын алу жұмыстары тәулік бойы жүргізілуде. Бүгін облыс бойынша Жайық өзенінде ұзындығы 72 км бөгет салынды, өзен жағалауы нығайтылды», — деді Тәткен.
Адамдарды қауіпсіз орналастыру үшін сыйымдылығы 8596 орындық 161 уақытша орналастыру пункті дайындалды.