Мемлекетіміз туризм саласына көңіл бөліп, оның ел игілігі үшін маңызы зор екеніне жыл өткен сайын көз жеткізіп келеді. Ақтөбе аймағы да тауымыз бен тасымыз, өзен-көлдеріміз, қойнауында талай сыр жатқан жазира даламызды танытуды қолға алды, нәтижесі көңіл қуантады. Өңірдің кереметін көруге асыққан туристер қатары артты. Биыл да бұл үрдіс жалғасын таппақ. Өйткені, Ақтөбе облысының кәсіпкерлік басқармасы және Visit Aktobe туристік орталығы отандық туризмді дамыту, аймақтың туристік әлеуетін арттыру мақсатында шетелдерде роуд-шоу ұйымдастырды.
Мәдени-танымдық шара алдымен Астанадан басталды. Желтоқсан айында мұнда Aktobe Investment форумы өтті. Шетелдік елшілер, инвесторлар жиналған ауқымды шарада өңірдің туристік әлеуеті таныстырылды. Ұлттық дәмдердің қонақтар дәмін көріп, тамсанды. Ақтөбелік дизайнер Малика Дүйсенбаеваның заманауи стильде тіккен ұлттық нақыштағы киімдеріне қызыға қарады.
Таныстырылым елордадан бөлек, Алматы, Түркияның Стамбұл, Әзірбайжанның Баку, Татарстанның Қазан, Ресейдің Мәскеу қалаларында ұйымдастырылды. Бұл жерлерде роуд-шоудың өтудегі басты себептерінің бірі – Ақтөбеге тікелей әуе рейсінің барында.
Жалпы Ақтөбеден барған делегация мәдени-танымдық шара барысында өңірдің туристік әлеуетін таныстыратын презентацияны көпшілік назарына ұсынды.
Ақтөбе облысы Қазақстанның солтүстік-батыс бөлігі және әлемнің екі бөлігі – Еуропа мен Азияда орналасқан. Бірегей географиялық орналасуы мен табиғи-климаттық жағдайларының арқасында өңір Қазақстанның алдыңғы қатарлы орталықтарының бірі саналады.
Өлкеде 72-ден астам қасиетті нысан бар, оның 27-сі – Ұлттық қорға енген. «Ақтолағай» борлы тау кешені, «Аққайың» орман алқабы, Қарғалы су қоймасы, «Орқаш орманы», «Ақбота-Сәңкібай» шоқысы, «Барқын орманы», «Ырғыз Торғай резерваты», «Аққұм» шөлі, «Абат-Байтақ» мемориалдық кешені сияқты тарихи жерлер, ерекше ескерткіштер, қызықты туристік бағыттар, экстремалды турлар және ерекше демалыс орындары жетерлік.
Жыл сайын облыстағы туроператорлар шетелдік және қазақстандық жиһанкездерді таңқалдырудан алдарына жан салмай келеді. Алдағы уақытта да бұл үрдіс жалғасын таппақ.
Ал шараларға қатысқан барлық елдің туроператорлары Ақтөбедегі сауықтыру және емдеу турларына, авторлық және экскурсиялық бағыттарға қызығушылық білдірді, болашақ серіктестік орнату жайын егжей-тегжейлі талқылады.