Мемлекеттік органдар облыс кәсіпкерлерінің құқығын қорғау жөніндегі кеңесте айтылған ұсынымдардың басым бөлігін қабылдады. Бизнестегі өзекті мәселелер өңірлік кәсіпкерлер палатасы жанынан жұмыс істейтін кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес отырысы шеңберінде талқыланды, деп хабарлайды Өзгеріс.инфо.
Аталған жиында кәсіпкерлердің өтініші бірнеше мәселе төңірегінде қаралды. Алғашқы кезекте «Нұр» жеке кәсіпкерлігінің өтініші назарға алынды. Онда кәсіпкер Әсел Жапарқұлова жергілікті атқарушы органдардың оған екі қабатты сауда орталығын салу үшін ауданы 350 шаршы метр жер учаскесін беруден бас тартуына құқықтық баға беруді сұрады. Іскер әйелден бас тарта отырып, Үштөбе қаласының әкімдігі Әсел Жапарқұлова талап еткен учаске аукцион арқылы өтуі тиіс екенін ескерткен.
Бұл проблемалық мәселе кәсіпкерлер палатасы, прокуратура, экономикалық тергеу департаменті, жергілікті атқарушы орган өкілдерінің Қаратал ауданы бизнес-қоғамдастығымен көшпелі кездесуінде талқыланыпты.
Содан кейін заңгерлер кәсіпкердің Үштөбе қаласының әкімдігіне қайта жүгіну керек екенін алға тартқан. Сөйтіп, жергілікті атқарушы органдар тарапынан Әсел Жапарқұловаға учаске сауда-саттық арқылы берілуі тиіс деген жауап қайтарылған. Алайда «Нұр» жеке кәсіпкерлігінің аукционға қатысу құқығының қалай іске асырлатыны түсіндірілмепті. Осыған байланысты кеңесте «Қаратал ауданы Үштөбе қаласы әкімінің аппараты» ММ-ің кәсіпкерге жер учаскесін беруге арналған сауда-саттыққа қатысуға байланысты толық түсінік беру ұсынылды.
«Сокбаев-М» шаруа қожалығы басшысы Марат Сокбаев өңірлік палатаға жолдауы «Қазсушар» МКК қызылша егу үшін алқаптарды суаруға байланысты шарт жасасудан бас тартудан туындаған. Кәсіпкер жолдаған өтінішке қатысты кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңесте кәсіпкердің егіс учаскесін көру үшін комиссия құру қажет екені айтылған.
Тағы бір мәселе мемлекеттік сатып алу саласына қатысты болды. Тендерді аумақтық полиция департаменті жариялаған, ал кәсіпкер тапсырыс берушіден жауап ала алмаудың салдарынан өңірлік кәсіпкерлер палатасына жүгінген, сол себепті бизнес өкілінің сауалына облыстық полиция департаменті жауап беруі тиіс екені ұсынылды. Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес соңында облыстық кәсіпкерлер палатасының төрағасы Дәурен Оңалбаев аталған кеңестің кәсіпкерлер құқығын қорғаудағы тиімділіктің маңызын атап, ой қорытты.
Айта кетейік, өңірлік палатаның деректері бойынша өткен сегіз айда уәкілетті органдардың атына жіберілген 50 ұсынымның 90 пайызы мемлекеттік органдармен қабылданған.