Шымкент әкімі Ғабит Сыздықбеков клуб ойыншыларының орташа жалақысы 15 млн теңгені құрайтынын, алайда қала билігі бұл мәселеге араласа алмайтынын мәлімдеді, деп хабарлайды KazFootball.kz.
«Бізге «батпаққа батқан» команда қалдырылды. Команда ойыншыларының орташа жалақысы – 15 млн теңге. Асхат Тағыберген («Ордабасының» жартылай қорғаушысы әрі капитаны – ред.) ойнай алмайды, бірақ кетпейді, жай ғана отыр. Ашық айтайын, жалақысы – 20 000 000 теңге. Мен бұл жағдайды өзгерте алмаймын», – деді Сыздықбеков.
Әкімнің айтуынша, ойыншылармен келісімшарттар 2 жылға жасалған және УЕФА-да тіркелген. Егер келісімшарттар бұзылса, толық өтемақы төлеуге тура келеді.