Роналду, Месси, Илон, Конор, тіпті Трамп. Ұлттық статистика бюросының мәліметіне сүйенсек, тәуелсіздік алғалы бері қазақтар баласына қойған сирек аттардың қысқаша тізімі осындай, деп жазады ozgeris.info.
Алдымен Роналдуға тоқталсақ. 4 жасар Қызылорда қаласының тұрғыны футбол ойнайтын болса, жейдесіне «Роналду» деп мақтанышпен жазып ала алады. Еліктеу емес, өз аты. Ата-анасы даңқты футболшының жолын қусын десе керек.
Ал, Криштианудың бітіспес қарсыласы атанған Мессидің құрметіне ат қойғандар да бар екен. Қазақ Месси Шымкент қаласында туған. 2 жаста. Қызылордалық Роналдудан 2 жас кіші. Даңқты Криштиану да Лионельден 2 жас үлкен. Қандай сәйкестік! Егер де екеуі де доп қуып жатса, қазақстандықтар алдағы жылдары Қызылорда мен Шымкент балаларының футболын іздеп көретін сияқты.
Илон есімді 10, Мозес атты 1 қазақ бар. Конор деген 1 ер-азамат жүр екен. 4 қазақ баласына Тайсон атын берген.
Айтпақшы, біздің өз Трампымыз бар. Ол — 36 жаста. Бұл азамат туған жылдары қазіргі АҚШ президентінің кәсіпкер ретінде тасы өрге домалап, байлығы күн сайын 230 мың долларға артып жатқан еді. Сол туралы ақпарат ата-анасына түрткі болса керек. Ұлттық статистика бюросының мәліметіне сенсек, қазақстандық Трамп Алматы қаласында тұрады.
Қыз балаға да ерекше ат қоятындар аз емес. Мысалы, Джоли есімді 1 қазақ қызы бар екен. Голливуд жұлдызы Анджелина Джоли сияқты танымал болсын деген ниет шығар. Осындай тілекпен 51 қызға Анджелина деп ат қойылыпты. Бір Хилари, Гага есімді 3 қаракөзіміз бар екен.
Әлемге танымал шетелдіктерді ғана құрмет тұтпай, қазақ тарихындағы белді тұлғаларды да ұлықтайтындар аз емес. Мысалы, қызына Тұмарша деп ат қойғандар бар. Ресми дерекке сүйенсек, ондайлардың саны — 14. Томирис туралы фильм себеп болса керек, бір қаракөзімізді Тақмарыс деп атапты.
Атилла есімді 69 қазақ бар.
- Білге 23
Күлтегін 23
Қорқыт 15
Тұғырыл 8
Тоныкөк 5
Мөде 4
Мөңке 3
2024 жылы ер балаларға ең көп қойылған есімдер тізімін — Мұхаммед бастап тұр. 3623 сәбидің туу туралы куәліге осы ат жазылған. Одан кейін Айсұлтан (2845) пен Алихан (2711) деген есімдер топ басында.
Ал қыз балаларға келсек, былтыр Айлин атты 5564 бүлдіршін туған. 5401 ата-ана қызын Медина деп атаса, тағы 5009 отбасы Асылым деген есімді ұнатыпты.
Дереккөз: tiek.kz