Ильхам Әлиев Баку-Грозный бағыты бойынша ұшып бара жатқан AZAL ұшағы жолаушыларының өліміне Ресей өкілдері кінәлі екенін мәлімдеді.
6 қаңтарда Әзірбайжан президенті қаза тапқан экипаж мүшелерінің отбасы мүшелерімен және ұшақ апатынан аман қалған бортсеріктермен кездесті. Оның айтуынша, әуе кеңістігінің жабылуын білдіретін Грозныйдағы «кілем» операциясы ұшақ жерден атып түсірілгеннен кейін ғана жарияланған.
«Бұл жерде елеулі қылмыс бар екенін тағы да дәлелдейді. Әдетте, егер қандай да бір елдің әуе кеңістігінде қауіп туындаса, ол дереу жабылады. Бұл барлық елдерде жалпы қабылданған тәжірибе, бірақ оның атаулары өзгеше болуы мүмкін. Ресейде мұны «кілем» операциясы деп атайды. Егер Ресейдің әуе кеңістігіне қауіп төнген болса, ұшақ капитанына бұл туралы дереу хабарлануы тиіс еді. Әуе кеңістігі бірден жабылып, ұшақ қайтып келуі тиіс еді. Сондай-ақ, апаттан шамамен 10 күн бұрын осындай оқиға Грозный қаласының маңында орын алғанын атап өткім келеді. AZAL-қа тиесілі ұшақ жарты жолда бұрылуға мәжбүр болды. Неліктен бұл жолы ұшақ экипажы ескерту алған жоқ? Мұны, әрине, тергеу анықтайды», — деді Әлиев.
Президент егер Грозныйда жер үсті қызметтерінің барлық ережелерін сақтай отырып, Ресейдің әуе кеңістігін жабу, сондай-ақ РФ Қарулы Күштері мен азаматтық қызметтер арасындағы үйлестіру бойынша дер кезінде шаралар қабылданса, онда бұл қасірет те болмас еді деп есептейді.