«Оралға тек орыс театры керек пе?»: Жөндеуге 700 млн бөлінген қазақ театры жемқорлықтың құралына айналды

25.02.2025 523 рет қаралды Пікір жазу
Фото: uralskweek.kz
Белгілі журналист Алмас Алтай қазақ намысын таптаған Батыс Қазақстан облысының билігінен жиіркенетінін айтып, сол өңірдегі мәселені көтерді.
«Орал деген облыс орталығы бар. Батыс Қазақстанның кіндігі. Былайғы жұрт «ой, Оралың орыс қой» дегенде шамданып қалушы едім… Мынадай хабар естідім. Қатты ашуландым,  бұлай дегенім тек сыпайыгершілігім, әйтпесе, тапталған қазақ намысы үшін БҚО билігінен жиіркеніп отырмын», — деп бастады ол ойын. 
Хадиша Бөкеева атындағы қазақ драма театры екі жылдан бері алқам-салқам күйде тұр. Жартылай бұзылған, не төбесі толық жабылмаған, не жылуы толық жүргізілмеген. Қаптаған костюм қоры, қыруар реквизит байлық, бәрі желдің өтінде, жаңбыр мен қардың астында жатыр.
Жөндеу ісін мойнына алған, яғни, тендерді ұтып алған «Өркен Сервис» деген мекеме Бөкеева театрының өркенін өсірмеген.
Мемлекеттік сатып алу басқармасы нысанның жөндеуін 737 000 000 теңгеге бағалап, «Өркенмен» шартқа отырған. Тіпті, оның 400 000 000 теңгесін мердігерге аударып та жіберген.
Алайда, не біткен іс жоқ, не жасалып жатқан жұмыс жоқ. Қазір Бөкеева театрының жағдайы адам аяғандай.
Неге жасалмады? Неге жұмыс бітпеді? Өйткені, «Өркен Сервистің» өзі де таза емес көрінеді. Сол жұмысты бастаған жылдың желтоқсанында жергілікті сот конкурстың әділ өтпегенін анықтап, келісімшартты жарамсыз еткен-ді.
Прокуротура мен ішкі аудит қызметі үңіле зерттеп, шын мәнінде конкурстан кеткен шикіліктерді анықтаған. Яғни, мемлекеттік сатып алулар басқармасы да осындай жүгенсіздікке жол берген.
Осылайша, әуел бастан былықтырып, таза конкурс өткізілмеген соң түптеп келгенде сорлаған Оралдағы Қазақ Драма Театры боп отыр.
«Орысы ормандай сыңсыған өңірдегі ұлттық руханиятқа қорған боп тұрған жалғыз театрды қан қақсатып қойған облыстық биліктің де беті бүлк етпейді. Қайта сол Бөкеева театрының басымен қайғы боп жатқаны әбден ұнайтындай-ақ», — деп жазды Алмас Алтай. 

Жемқорлық па, немқұрайлылық па?

 

2023 жылы жөндеу жұмыстары басталған. Алайда мердігер компания «Өркен-Сервис» ЖШС құрылыс материалдарының қымбаттауына байланысты жобалық-сметалық құжаттаманы қайта қарауды талап етіп, БҚО мәдениет басқармасын сотқа берген. Бірақ тапсырыс беруші бюджет көлемін ұлғайтуға келіспеген. Сот процестерінің салдарынан қазақ драма театрының күрделі жөндеуі тоқтатылған. Ал оның қашан аяқталатыны белгісіз.

Уральская неделя сайтының мәліметінше, қазір мәдениет басқармасы жаңа байқау жариялап, басқа мердігерді анықтауға дайындалып жатыр. Сондай-ақ театрдың жөндеу жұмыстарын аяқтау үшін қосымша қаржы қажет екені де айтылуда. Себебі 2023 жылдың соңында сот БҚО мәдениет басқармасы мен «Өркен-Сервис» ЖШС арасындағы мемлекеттік сатып алу келісімшартын жарамсыз деп таныды.

Батыс Қазақстан басшылығы бұл күрделі жөндеу жұмыстарына қаражатты қайдан алатынын әлі білмейді. Облыс әкімдігі бюджет тапшылығына байланысты қосымша қаражат таба алмай отыр.

Тегтер