Қазақстанның Денсаулық сақтау министрлігі медициналық қызмет тарифтерінің көтерілгенін жариялады, деп хабарлайды Денсаулық сақтау министрлігінің баспасөз қызметі.
«2024 жылдың 1 маусымынан бастап қабылданған шешімдерге сәйкес жүкті және босанатын әйелдерге, сондай-ақ стационарлық жағдайда балаларға шұғыл медициналық көмек көрсететін ұйымдар үшін тарифтер көтеріледі», — делінген хабарламада.
Денсаулық сақтау министрлігінде мәлімдегендей, тарифтердің көтерілуі азаматтардың медициналық көмек алуға жұмсалатын шығыстарын азайтуға, сондай-ақ соңғы жылдары жиналған инфляциялық шығындарды медициналық ұйымдарға өтеуге және денсаулық сақтау саласындағы тұрақтылықты қамтамасыз етуге мүмкіндік береді.
«Денсаулық сақтау министрлігі медициналық қызметтерге шығынды тарифтерді қайта есептеуді жүргізді. Негізгі мақсат — медициналық ұйымдарға қаржылық жүктемені азайту және барлық азаматтар үшін жоғары сапалы медициналық көмектің қолжетімділігін қамтамасыз ету. Сақтандыру активтері есебінен бөлінетін қосымша қаражаттың жалпы сомасы денсаулық сақтау жүйесінің тиімсіз шығыстарын оңтайландыру нәтижесінде босатылды және Т20 млрд теңгені құрайды «, — деп толықтырды министрлікте.
Абдоминалдық хирургия, инфекция, неврология, гастроэнтерология, кардиология, травматология және ортопедия, нефрология, эндокринология, онкогематология сияқты басқа да бірқатар бағыттар бойынша тарифтерді кезең-кезеңмен арттыру жоспарланып отыр. Бұл мемлекет медициналық ұйымдарға медициналық қызмет көрсетуге байланысты шығыстарды кезең-кезеңмен өтейтінін білдіреді.