Мәжілісмен Нартай Сәрсенғалиев депутаттық сауалында көлікті 5 минуттан астам жылытқаны үшін айыппұлды алып тастауды талап етті.
«Егер біреу автокөлікті экологияға зиян келтіреді деп есептесе, онда алдымен ауаға тонна зиянды қалдықтар шығаратын зауыттар мен аспаннан қара қар түсетін кәсіпорындарды тәртіпке келтірсін», — деді халық қалаулысы.
Сондай-ақ, депутат премьер-министрдің орынбасары Роман Склярдың атына жолдаған сауалында такси және қоғамдық көлік қызметін реттейтін заң жобасын қайта қарауды өтінді. Ол жолаушылар тасымалы саласындағы мемлекеттік өкілеттіктердің бір бөлігін өзін-өзі реттеу ұйымдарына беруді көздейді. Сәрсенғалиев атап өткендей, құжат бұл компанияларға тарифтерді белгілеуге және бағаларды реттеуге өкілеттік береді.
«Әрине, мұндай ұйымдар азаматтарды аямайды. Тұтас саланы жеке құрылымдарға беру — бұл монополияны жасанды түрде құру. Біздің үкімет бұл жерде жаңашыл емес. Мысалы, Американың Калифорния штатында такси өзін-өзі реттейтін ұйымдардың қарамағына берілді. Салдары ауыр болды — салаға бақылау жасаған ұйым тек «өздерінің» таксомоторлық компанияларын тіркеп, қалғандарына тасымалдаумен айналысуға тыйым салды. Қауіпсіздікке қойылатын талаптардың жеңілдетілуіне байланысты такси жұмыс істей бастады. Нәтижесінде олардың қатысуымен болған ЖКО саны 15% -ға артты», — деп мысал келтірді депутат.