Елдос Қоспаевтың қылмыстық тобына сот үкімі оқылды, деп хабарлайды Azattyq Rýhy.
Астананың қылмыстық істер жөніндегі мамандандырылған ауданаралық соты Елдос Қоспаевтың қылмыстық тобының мүшелеріне үкім шығарды. Сотталушылар саны – 11 адам.
Елдос Қоспаев 15 жылға сотталды. Ол қауіпсіздігі орташа колонияда жазасын өтейтін болады.
Айта кетейік, ағайынды Елдос, Айдос, Айбек Қоспаевтар ұйымдасқан қылмыстық топ құрып, «AV-Construction» ЖШС, «Стекольный завод» ЖШС, «Шалқар 17» ЖШС, «Бахар-А» ЖШС сияқты ірі бизнестерді басып алған болатын. ҚМА бұған қатысты тергеуді аяқтап, Алматыдағы Айдос Қоспаевқа тиесілі «Никольский» базарының аумағында орналасқан жер учаскесі мен мүлкіне тыйым салған еді.
Кейін Қаржы мониторинг агенттігі бірнеше үлкен бизнесті басып алған ағайында Қоспаевтарға қатысты тағы бір қылмысты анықтаған еді.
«Алайда, биыл қыркүйек айында «Азаматтарға арналған үкімет» базасына жалған ақпарат енгізу арқылы құны 2,2 млрд теңге болатын мүлік пен жер учаскесі шетелдік инвесторларға одан әрі сату мақсатында бөгде тұлғаларға қайта ресімделген», — деп хабарлайды ҚМА.
Агенттік алаяқтық үшін бұрын сотталған үш адамды анықтап, оларды қамаған.