Қазақстан Қытайдан су алуға дайын, деп хабарлады су ресурстары және ирригация министрі Нұржан Нұржігітов.
«Біз Бұқтырма ГРЭС жұмысымен таныстық, нысанның бассейндік инспекциялармен өзара әрекеттесуін реттедік. Қазір шекарадағы жағдайға байланысты Қытайдан келген мамандармен тығыз жұмыс істеп жатырмыз. Бүгінде Қытайдан секундына 1810 текше метр су келеді. Бұқтырма су қоймасында 39 миллиард текше метр су жиналды. Нысан тағы 10 миллиард текше метр су қабылдауға қауқарлы. Осылайша, су қоймасы Қытайдан су қабылдай алады. Жағдай бақылауда. Бассейндік инспекция мен «Қазводхоз» мамандары тәулік бойы кезекшілікте», — деді министр Алтай қаласында Шығыс Қазақстан облысының тұрғындарымен кездесуден кейін.