3 сәуірде Астанада қырғыз киносы күндері ашылды.
Іс-шараға Қырғыз Республикасының Қазақстандағы елшісі Дастан Дюшекеев, ҚР Мәдениет және ақпарат министрлігі Мәдениет комитетінің төрағасы Күміс Сейітова, ҚР Сыртқы істер министрлігі, қырғыз диаспорасы мен БАҚ өкілдері қатысты.
Қырғыз киносы күнінің ашылуында қырғыз режиссері Руслан Акунның «Бейиш эненин таманында» (Пейіш ананың табанында) фильмі көрсетілді.
Фильм ой-өрісі сегіз жасар баланың деңгейінде қалып қойған жігіттің қиындыққа толы өмірі және ананың балаға деген махаббатыжайында.
Кинокартинаның көп бөлігі Қазақстан аумағында түсірілген.
Айта кетейік, фильмнің премьерасы Наурыз мерекесі қарсаңында Қырғызстан мен Қазақстан кинотеатрларында бірдей өтті.
Басты мақсат — екі елдің мәдени байланысын нығайтып, көрші елдің кино өндіру саласына қолдау көрсету.
Аталмыш фильм — қырғыз киносы күндері аясында қазақстандық көрермен көретін жалғыз картина емес.
4 сәуірде «Тенирберди» (Тәңірберді) фильмі көрсетіледі. Туынды жеңіл, комедиялық жанрдағы этикалық құндылықтар тақырыбын қозғайды.
Айта кетейік, екі ел киноөндірушілері бірлесіп, бірнеше сәтті жобалар жасады.
Атап айтсақ, қазақстандық және қырғызстандық кинематографистердің бірлескен жұмысы нәтижесінде «Үкім» фильмі түсірілді.
Фото: Мәдениет және ақпарат министрлігі