Maqsut Narikbayev University-інде Қазақстан Республикасы Ұлттық Ғылым академиясының Басқарма Президенті Күнсұлу Закарияның қатысуымен өткен дөңгелек үстелде ғылым мәселелері талқыланды, деп хабарлайды Өзгеріс.инфо.
Дөңгелек үстел барысында ЖОО басшылары халықаралық тәжірибені ескере отырып, елдегі ғылымды дамыту туралы өз ойларымен бөлісті. Қазақстанда ғылыми саланы дамыту бойынша бірқатар идеяларды Университет провосты Сергей Пен ұсынды.
«Біз ғалымның мансабын жастарға тартымды ету үшін оның мәртебесін көтерудің әртүрлі жолдары бар деп санаймыз. Неғұрлым прогрессивті тәсіл — бұл жоғары деңгейдегі профессордың жалақысын толық немесе ішінара жабатын мемлекет арасындағы, құқықтық сараптаманы қамтамасыз ететін немесе ғылыми зерттеу жүргізетін, оқушыларды дайындайтын профессор мен университет арасындағы үш жақты қарым-қатынас құру. Университет оған жағдай жасап, оның қызметін операциялық бақылауға жауапты болады», — деді провост.
Өз сөзінде Қазақстан Республикасы Ұлттық Ғылым академиясының Басқарма Президенті Күнсұлу Закария жоғары оқу орнының жұмысын жоғары бағалап, жалпы ғылымды дамытудағы ынтымақтастықты ұсынды.
«КАЗГЮУ Қазақстанның жетекші университеттерінің бірі. Менің түсінігімде, Қазақстандағы ең прогрессивті университет. Мен бұл университетке бірінші рет келіп тұрмын.
Біздің алдымызда ғылымды жоғары деңгейге көтеру, сондай-ақ ғылым экономикамыздың түрлі саласына ықпал етіп, үлес қосу бойынша үлкен міндет тұр», — деді Күнсұлу Закария.
Өз кезегінде университеттің Басқарма төрағасы Талғат Нәрікбаев қолдау білдіріп, университет отандық ғылымды дамытудың бір бөлігі болуға дайын екенін атап өтті.
«Біз шынымен де үйлестіруші болуға және сіздің революциялық идеяларыңыздың, іс-әрекеттеріңіздің бір бөлігі болуға дайынбыз, сондай-ақ, әрине, бізге заңнамалық негіз қажет. Бұл үшін бізде база қалыптасқан, ғалымдар мен мамандар бар, олар осы іске атсалысуға дайын», — деді Талғат Нәрікбаев.