Еңбек және халықты әлеуметтік қорғау министрлігі қазір елімізде қанша Ұлы Отан соғысының ардагері тұратынын мәлімдеді, деп хабарлайды Ozgeris.info порталы Sputnik Қазақстанға сілтеме жасап.
«2022 жылдың 1 сәуіріндегі жағдай бойынша Қазақстанда Ұлы Отан соғысына қатысқан 387 ардагер мен мүгедек тұрады», — делінген министрлік хабарламасында.
Ал бір жыл бұрын дәл осы уақытта елімізде Ұлы Отан соғысының 665 ардагері мен соғыс кезінде мүгедек болған адам тұрған. Осылайша олардың саны бір жылда 278 адамға азайды.
Сондай-ақ 2022 жылдың бірінші сәуіріндегі жағдай бойынша Қазақстанда ҰОС жеңісіне үлес қосқан 72 468 азамат тұрады, оның ішінде:
- Қоршаудағы Ленинград тұрғындары – 91 адам;
- Концлагерьлердің кәмелетке толмаған бұрынғы тұтқындары – 205;
- Қайтыс болған ҰОС мүгедектерінің әйелі (күйеуі) – 2 918;
- ҰОС кезінде қаза тапқандардың жесірлері – 6;
- Тыл еңбеккерлері – 69 248.
ҰОС ардагерлері мен оларға теңестірілген тұлғалар қандай төлемдер алады деген сұраққа еңбек министрлігі бұл мәселені әр өңір әкімдігі өз бетінше шешетінін айтты. Алайда министрліктің ұсынымдарына сәйкес, барлық өңірде кемінде бір рет материалдық көмек көрсету көзделген:
- ҰОС қатысушылары мен мүгедектеріне – 1 миллион теңге;
- Концлагерьлердің кәмелетке толмаған бұрынғы тұтқындарына – 100 мың теңге;
- Қоршаудағы Ленинград тұрғындары мен ҰОС кезінде қаза тапқандардың жесірлеріне – 60 мың теңге;
- ҰОС қайтыс болған мүгедектердің әйеліне (күйеуіне) және тыл еңбеккерлеріне – 30 мың теңге.
Ozgeris.info порталы