Сәуір айында Алматы мен Астанадағы жаңа тұрғын үйлер бағасы айтарлықтай қымбаттады. Алматыда бұл – 2023 жылдың қыркүйегінен бергі ең жоғары айлық өсім болса, Астанада мұндай серпіліс 2022 жылдың қарашасынан бері алғаш рет тіркеліп отыр, деп хабарлайды ozgeris.info сайты DATA HUB Telegram-арнасына сілтеме жасап.
Аналитиктердің мәліметінше, сәуірде Алматыдағы жаңа тұрғын үйлердің бағасы бірден 3,4%-ға өскен. Бұл көрсеткіш соңғы жеті айдағы ең жоғары өсім болып отыр. Жалпы алғанда, бұл сегменттегі баға қатарынан сегізінші ай бойы өсіп келеді.
Астанада баға өсімі сәл төмен – 2,5%. Алайда елорда үшін бұл да маңызды көрсеткіш, өйткені мұндай серпінді өсім соңғы рет 2022 жылдың қарашасында байқалған.
Жыл басынан бері бағаның жалпы өсімі Алматыда +7,8%-ды, ал Астанада +4,4%-ды құрады. Сарапшылардың айтуынша, дәл осы екі қалада елімізде пайдалануға берілетін көпқабатты тұрғын үйлердің басым бөлігі шоғырланған.
Мамандардың пікірінше, бұл үрдіске құрылыс материалдарының қымбаттауы, сұраныстың артуы және шектеулі ұсыныс әсер етіп отыр.