Ақтөбе облысында жоғалған баланың денесі табылды, деп хабарлады облыстың полиция департаменті.
«Үздіксіз іздестіру шараларының нәтижесінде Елек өзенінде «Юрта» мейрамханасы маңында жоғалған кәмелетке толмаған Житру Кәрімнің денесі табылды», — делінген полиция хабарламасында.
Жоғалған баланы іздеу 4 тәулік бойы жүргізілді. Іздеуге 500 адам қатысты, соның ішінде полиция қызметкерлері, ТЖБ, еріктілер, сондай-ақ қызметтік иттер мен 40 бірлік техника, 3 квадроцикл, 2 қайық, 4 жылқы, дрондар пайдаланылды. Сондай-ақ, шатырлар мен үйлердің аулалары, кәріз люктері, қазылған шұңқырлар тексерілді.
«Полиция тексеру жүргізіп, қажетті сараптамалар тағайындады.
Полиция департаменті қаза болған баланың туған-туыстары мен жақындарына көңіл айтады «, — делінген хабарламада.
Бұрын хабарланғандай, 13 жасар бала 4 маусымда жоғалып кеткен. Ол атасымен әжесінің қонағында болды, жеке үйдің ауласынан шықты, кейін оны ешкім көрген жоқ. Сондай-ақ баланың аутизммен ауырғаны белгілі болды.