Қазақстан Ұлттық банкінің Ақша-кредит саясаты комитеті базалық мөлшерлемені жылдық 16,5% деңгейінде +/- 1 пайыздық дәлізбен сақтау туралы шешім қабылдады, деп хабарлайды Ozgeris.info тілшісі Informburo.kz порталына сілтеп.
Қаржы институтының мәліметінше, жиынтық ақша-кредит талаптары сұраныс серпінін бәсеңдету мен инфляцияны төмендету үрдісін бекіту үшін біршама қатаң деңгейде сақталады.
«Инфляциялық факторлардың тепе-теңдігін, оның қазіргі қарқынын, проинфляциялық үрдістер мен сыртқы ортадағы белгісіздіктің жоғары деңгейін ескере отырып, алдағы уақытта базалық мөлшерлемені төмендетуге алғышарттар жоқ. Келесі болжамдық кезеңде тәуекелдер балансы – салық реформасының ықтимал салдары, АҚШ тарифтік саясатының әсері және басқа да факторлар ескеріліп, қайта бағаланады. Мөлшерлеме бойынша шешімдер келіп түсетін деректер мен инфляция болжамының негізінде қабылданады», – делінген Ұлттық банктің хабарламасында.
Келесі жоспарлы шешім 5 маусымда жарияланады.