Жалпы, оның қорытындыларын Президенттің ұлттық бірегейлікті нығайтуға, өңірлерді дамытуға, мемлекеттік басқаруды жетілдіруге және әлеуметтік тұрақтылықты қолдауға бағытталған стратегиялық бастамаларын жүзеге асырудағы маңызды қадам ретінде қарастыруға болады.
Құрылтай барысында салық реформасына ерекше назар аударылды. Президент ҚҚС мөлшерлемесін арттыру қажеттігін атап өтті, бұл қоғамда пікірталас тудырды. Бұл қадам мемлекеттің әлеуметтік міндеттемелерін орындауы үшін бюджеттік кірістерді арттырудың объективті қажеттілігін көрсетеді. Дегенмен, салық реформасы мемлекеттік фискалдық мүдделер мен қолайлы іскерлік ахуалды сақтау арасындағы тепе-теңдікті ескеруі маңызды.
Сондай-ақ, нақты экономика секторын қаржыландыруды екі есе арттыру және инфрақұрылымдық жобаларды қолдау маңызды аспектілердің бірі болды. Бұл Президент өз бағыты аясында бекіткен «Күшті өңірлер – күшті ел» қағидатына сәйкес келеді. Алайда, бұл бастамалардың табысты болуы бюджет қаражатын тиімді пайдалануына тікелей байланысты.
Ұлттық құрылтай ұлттық бірегейлікті нығайту мен мәдени саясаттың маңыздылығын атап өтті. Осы тұрғыда шетелде Абай институттары желісін құру жобасы ерекше мәнге ие. Бұл қазақ мәдениетін халықаралық деңгейде ілгерілетуге, Конфуций немесе Гёте институттары үлгісінде дамытуға мүмкіндік береді.
Сонымен қатар, Құрылтай қоғамдық этиканы реттеу, деструктивті идеологиялармен және алаяқтықпен күрес мәселелерін көтерді, бұл әлеуметтік дамуға кешенді көзқарасты көрсетеді.
Инфрақұрылымды дамыту бойынша жарияланған жобалар – Астанадан Транскаспий бағытына магистраль салу, Арқалық әуежайын қалпына келтіру – елдің көлік байланысын жақсартуға және өңірлік теңсіздікті төмендетуге бағытталған. Алайда, бұл жобаларды жүзеге асырудағы басты сын-қатер – олардың ашықтығын қамтамасыз ету және сыбайлас жемқорлық тәуекелдерін барынша азайту.
Президент цифрландыруды, жасанды интеллектіні және адами капиталды Қазақстан дамуының негізгі факторлары ретінде атады. Бұл – жаһандық үрдістерге сай қадам, алайда осы бағыттардың сәтті жүзеге асуы білім беру, ғылыми зерттеулер және технологиялық стартаптарды қолдауға кешенді инвестициялар тартуды талап етеді.
Ұлттық құрылтай Қазақстанның жүйелі реформалар бағытына адалдығын растады. Дегенмен, бұл бастамалардың табысты болуы олардың орындалу сапасына, институционалдық бақылау тетіктеріне және азаматтық қоғамның қатысуына байланысты. Құрылтай экономикалық және әлеуметтік саясаттың өзара үйлесімділігін, сондай-ақ ұлттың идеологиялық бірлігін нығайтудың маңыздылығын айқындады.
Качеев Денис Анатольевич
Философия ғылымдарының кандидаты,
Қостанай филиалы ЧелМУ профессоры,
Қостанай облысы Қоғамдық кеңесінің мүшесі