Қазақстандық пойыздардағы интернет 2025 жылдың басында пайда болады, деп хабарлайды Ozgeris.info.
Бұл туралы сандық даму, инновация және аэроғарыш өнеркәсібі вице-министрі Ростислав Коняшкин Мәжілістегі үкімет сағатында мәлімдеді.
Ол өткен жылы республикалық жолдардың бойындағы «ақ дақтар» бойынша талдау жүргізілгенін айтты.
«Талдау негізінде біз қосымша антенна-діңгек құрылыстарын орнату қажет 243 нүктені анықтадық. Қазір әкімдіктер жобалау-сметалық құжаттаманы әзірлеуде. 80-ге жуығы жүзеге асырылды. 2025 жылы республикалық маңызы бар жолдардағы «ақ дақтар» жойылады. Сондай-ақ жергілікті деңгейдегі жолдарды талдау басталды, оның нәтижелері ескеріліп, жоспарға енгізіледі», — деп толықтырды Коняшкин.
Оның айтуынша, темір жол пойыздарында интернеттің оңтайлы нұсқасын таңдау үшін түрлі технологияларға талдау жүргізілді. Ең оңтайлы нұсқа ретінде ол төмен орбиталы жерсеріктер арқылы интернетті атады.