Жаттығу залында балаларға ұрсып, тек қазақша сөйлеуді талап еткен бокс жаттықтырушысы Мұхит Амантаев қызының орысша сөйлейтінін айтты. Бұл туралы Нартай Аралбайұлының Youtube-арнасы хабарлады.
«Үш балам бар. Екі балам қазақи, ал қызым орысша сөйлейді. Қызыма күніге айтамын, орысша сөйлеме, қазақша сөйле, орысша сөйлемеу керек деп. Орысша сөйлейтін кез келеді, орыс тілінде далада сөйлесесің деп айтамын. Қазақша сөйлеп үйреніп жатыр», – деді жаттықтырушы.
Сондай-ақ Мұхит Амантаев бойында мақтанқұмарлық бар екенін мойындады.
«Ондайым бар. Сүттен ақ, судан тазамын деп айта алмаймын. Адам пенде болғаннан кейін мақтаншақтық қасиеттер болады», – деді Мұхит Амантаев.
Айта кетейік, бұған дейін бокс жекпе-жек жаттықтырушысы Мұхит Амантаев жаттығу залында балаларға ашуланып, спорт залында тек қазақша сөйлеуді талап еткен еді. Ол балаларды оңбағандар деп атап, қазақы намыс болу керек екенін айтқан болатын.