Әлеуметтік желіде балаларға «қазақша сөйлеңдер» деп ақыл айтып, танымал болған бапкерге қызмет ұсынылды. Бұл туралы КТК арнасы хабарлайды.
Қазақ ММА Boxing клубының жетекшісі Мұхит Амантаев бүгінде парламенттің жиі қонағы. Ол мәжіліс пен сенат қабырғасындағы спорттық мәселелерді ортаға салып, талқылауға спикер ретінде қатысып жүр.
Жаттықтырушыны әзірше танымал еткен осы видео. Жаттығуға келген балаларға ана тілінде тілдесу керек деп ақыл айтып жатқан үзінді әлеуметтік желіде тез тарап, әлі де қызу талқыланып жүр. Бірақ Мұхит Амантаев патриоттық мазмұнда бейнеүндеулерді жиі жариялап жүргенімен, бұлай ғана танымал болуды қаламапты. Мыңға жуық шәкірті бар маман жуық арада Олимпиада чемпонын шығармай қоймаймын деп отыр.
«Қазақ тілі тек қазақ баласына керек. Менің залымның өзі «Қазақ ММА Boxing» деп аталады. Атының өзі қазақ боксы болып тұр. Мен бөтен елде жүрген жоқпын ғой. Өз елім, жерім болғаннан кейін сұраймын. Менің бокс залымда мінетті түрде қазақша сөйлеуі керек”, – дейді бапкер Мұхит Амантаев.